Kalfou verite 

Nan kalfou verite tout sekrè 
Benyen kò touni 
Lè boko mayas la debouche 
Se anba nen yon sèl moun 
Pou sant lan monte 
M pa kwè w ap vin mande m  
Kisa m vle di 
Ni kilè sa pral fini 

Sou silans mwen m te chita 
M t ap kesyone misyon 
Lang ak dyòl gen pou akonpli 
Lespri revolisyonè dyòl alèlè m 
Fè m konnen m dwe ekri “kalfou verite”
Ladan yo va konnen kisa m konstate
Kòman n dwe kanpe  
Ak enpòtans tèt kole 

Nou se nasyon k plis maltre 
Malgre tout kapasite n posede
Ak tout bon fwi n ka pote 
Se pa poutèt yon pyebwa tonbe
Pou n kite l gaspiye 
Avan lò a te vin presye 
Li te pase anba dife 
Men anpil chay pa lou tande…
 
Papa k ap monte pitit fi  
Tout bagay fin fèt 
Men yo paka met sa nan lari 
Lenj lan fin lave nan fanmi 
Men li vin rense nan “kalfou verite”

Si pa t gen sitirè 
Pa t ap gen vòlè

Pou jèn gason k tonbe
Politik prizon kraze 
Prizonye soti tou ame 
Tèt chaje! 
Demokrasi melanje ak diktati
Egal ak anpil demagoji 

Gen sa k pa menm chwazi 
Pou yo dirije yon fanmi 
Poutan yo gen foli prezide sou tout yon peyi
 
Nou pa gen ase lank pou nou ta fin ekri 
Ni dyòl pou n pale tout koze k ap pase  
Men nan kalfou verite
Tout koulèv dòmi tèt deyò
Pa gen ni granri ni kouridò
Kanta pou verite
N ap bay li san triye.